1.75 કરોડનું બટર ચોરાયું.!! જાણો ક્યાં અને કેવી રીતે થઇ આ ચોરી…

ચોરીના ઘણાં કિસ્સાઓ રોજબરોજ આપણા કાને પડતાં હોય છે. કિંમતી સરસામાન ચોરાવાની ઘટનાઓ સામાન્ય થઇ ગઇ છે. આ દરમિયાન 1.75 કરોડ રુપિયા કિંમતનું બટર ચોરાયાનો કિસ્સો પ્રકાશમાં આવ્યો છે. ચોરાયેલું આ બટર હતું, મહેસાણા દૂધસાગર ડેરીનું. સાંભળીને ઝાટકો લાગ્યોને.. પરંતુ વાત એકદમ સાચી છે. મહેસાણા દૂધસાગર ડેરીમાં 1.75 કરોડનું બટર ચોરાયું હોવાનો આક્ષેપ થતા ભારે ખળભળાટ મચી ગયો છે.

મહેસાણા જિલ્લામાં આવેલી દૂધ સાગર ડેરી એશિયા ખંડની સૌથી મોટી ડેરી માનવામાં આવે છે. તેમજ દૂધસાગર ડેરી વાર્ષિક હજારો કરોડોનું ટન ઓવર ધરાવે છે. મહેસાણાની દૂઘસાગર ડેરીએ દેશ-દુનિયામાં ડંકો વગાડી ચૂકી છે. આ ડેરી દુધ ઉત્પાદકો દ્વારા સહકારી ધોરણે ચલાવવામાં આવે છે. દૂધસાગર ડેરી દૂધ ઉત્પાદન ઉપરાંત પશુ કલ્યાણ કાર્યક્રમો પણ ચલાવે છે. દૂધની બનાવટો, પશુઓના દાણ માટેનું દાણ, માંદા પશુઓની સારવાર, પશુપાલન વિશે માર્ગદર્શન, સંવર્ધનની કામગીરી જેવાં અનેક કાર્યો પણ દૂધ સાગર ડેરી દ્વારા કરવા આવે છે.

આ મહેસાણા દૂધસાગર ડેરીનું કરોડો રૂપિયાનું બટર ચોરાયું છે. સહજાનંદ કોલ્ડ સ્ટોરેજ બાલવા ખાતે બટરનો મોટો જથ્થો રાખવામાં આવ્યો હતો. કોલ્ડ સ્ટોરેજ ડેરી દ્વારા માસિક 3.39 લાખ ભાડાથી બટરનો મોટો જથ્થો રાખવામાં આવ્યું હતું. આ કોલ્ડ સ્ટોરેજમાં ડેરીના કુલ 57220 બોક્સ જેની અંદાજિત રકમ 30.89 કરોડ થવા જાય છે, જે સ્ટોરેજમાં રાખવામાં આવ્યું હતું. કોલ્ડ સ્ટોરેજ અને ડેરીના એગ્રીમેન્ટ મુજબ જ્યારે બટર ચોરાય કે બગડી જાય તો કોલ્ડ સ્ટોરેજ સામે ફરિયાદ થાય છે. પરંતુ આ મામલે ડેરીના પૂર્વ વાઇસ ચેરમેન મોંઘજીભાઈ દેસાઈએ ગંભીર આક્ષેપ કર્યા છે.

કોલ્ડ સ્ટોરેજ દ્વારા માત્ર 15 બોક્સ ચોરીની ફરિયાદ કરવામાં આવી છે. વાસ્તવમાં 1.75 કરોડનું બટર ચોરાયું હોવાનો આક્ષેપ થઈ રહ્યો છે. જાણવા મળી રહ્યું છે કે કોલ્ડ સ્ટોરેજના માલિકને ડેરી બચાવી રહી છે. કોલ્ડ સ્ટોરેજના માલિક માણસાના રાજકીય આગેવાનના ભાગીદાર હોવાનું ખૂલ્યું છે. ભાગીદાર હોવાને કારણે ડેરી કરોડોની બટર ચોરીમાં ભીનું સંકેલતી હોવાનો આરોપ લાગ્યો છે.