તિહાર જેલમાંથી દોસ્તના છુટકારા બાદ લેવા પહોંચેલા 83 લોકો જેલમાં પહોંચ્યા, જાણો શું છે મામલો

રાજધાની દિલ્હીની તિહાર જેલમાંથી જામીન પર બહાર આવેલા તેના સાથી બદમાશના સન્માનમાં રસ્તા પર પરેડ કરવાની અને તેને વિશેષ અનુભવ કરાવવાની યોજના તેના સાથીદારોને મોંઘી પડી. આ લોકો હવે જેલની હવા ખાઈ રહ્યા છે. દક્ષિણ પશ્ચિમ દિલ્હીના દિલ્હી કેન્ટ પોલીસ સ્ટેશન વિસ્તારમાં, પોલીસે ગુરુવારે રાત્રે 83 લોકોની રોડ પર હંગામો કરવા અને જાહેરમાં ઉપદ્રવ કરવા બદલ ધરપકડ કરી હતી. જેમાંથી તેમની સામે હત્યા, હત્યાનો પ્રયાસ, લૂંટ અને આર્મ્સ એક્ટ હેઠળ 33 કેસ નોંધાયેલા છે.

આ કાફલામાં અનેક વીવીઆઈપી વાહનો હતા. ઘણા વાહનોમાં સાંસદ-ધારાસભ્યના સ્ટીકરો હતા. જેમાં સિદ્ધુ મુસેવાલાનો ફોટો હતો, જેઓ થાર જીપ પર એકે-47 લઈને જતા જોવા મળ્યા હતા. આ તમામ આરોપીઓ તિહાર જેલમાંથી જામીન પર છૂટેલા સાથીની ઉજવણીમાં રસ્તા પર હંગામો મચાવી રહ્યા હતા. પોલીસે તેમની પાસેથી 19 વાહનો અને બે ટુ-વ્હીલર જપ્ત કર્યા છે.

દક્ષિણ પશ્ચિમ જિલ્લાના ડીસીપી મનોજ સી દ્વારા આ વાતની પુષ્ટિ કરવામાં આવી છે. તેમણે જણાવ્યું કે તુગલકાબાદ એક્સટેન્શનની શેરી નંબર 6 ના રહેવાસી આબિદ અહેમદને ગુરુવારે રાત્રે તિહાર જેલમાંથી જામીન પર મુક્ત કરવામાં આવ્યો હતો. વસંત કુંજ ઉત્તરના એક કેસમાં તેને જેલમાં ધકેલી દેવામાં આવ્યો હતો. પોલીસને માહિતી મળી હતી કે આરોપી બદમાશને લેવા તેના મિત્રો અને સહયોગીઓ મોટી સંખ્યામાં આવ્યા છે. તેને તિહાર જેલમાંથી તુગલકાબાદ લઈ જવામાં આવી રહ્યો હતો. જામીન પર છૂટેલા વ્યક્તિ સાથે મોટી સંખ્યામાં લોકો સામેલ હતા, જેમને પોલીસે બેડ કેરેટકર તરીકે જાહેર કર્યા છે. આ લોકો વાહનોમાં લાઉડ સ્પીકર વગાડીને અને હંગામો મચાવીને બેલ પર છુટનારા વ્યક્તિની આસપાસ જતા હતા, જાણે કે આરોપી બદમાશ ન હોઇ કોઈ સેલિબ્રિટી હોય.

પોલીસે તે કાફલાને અટકાવ્યો હતો. દરેકને કસ્ટડીમાં લેવામાં આવ્યા હતા. આ પછી કાયદેસરની કાર્યવાહી હાથ ધરવામાં આવી હતી અને પૂછપરછ બાદ 83 લોકોની ધરપકડ કરવામાં આવી હતી. એક સગીરની પણ ધરપકડ કરવામાં આવી હતી, જેને બાદમાં છોડી દેવામાં આવ્યો હતો. આ તમામ લોકો જાહેર સ્થળે હોબાળો મચાવી રહ્યા હતા. જે વાહનોમાં તેઓ હંગામો મચાવતા હતા તે વાહનો પણ જપ્ત કરવામાં આવ્યા છે. 19 કાર જપ્ત કરવામાં આવી છે. હવે આ મામલે પોલીસ ટીમ આગળની કાર્યવાહી કરી રહી છે.