બોરસદમાં શંકાસ્પદ ટ્રેલરને રોકવા જતાં પોલીસ કોન્સ્ટેબલને કચડી નંખાયો.!! હરિયાણા, ઝારખંડ બાદ ગુજરાતમાં પણ હિટ એન્ડ રન…

દેશમાં પોલીસકર્મીઓને કચડી નાખવાની ત્રીજી ઘટના સામે આવી છે. તાજેતરમાં હરિયાણા, ઝારખંડ બાદ હવે ગુજરાતમાં પોલીસકર્મી પર વાહન ચલાવી કચડી નાખવામાં આવ્યો છે. જે પ્રકારે હરિયાણામાં ડીસીપીને જે પ્રમાણે કચડી નાખવામાં આવ્યા હતા તે પ્રમાણેની ઘટના ગુજરાતના બોરસદમાંથી સામે આવી છે. અહીં નાઇટ પેટ્રોલીંગ દરમિયાન શંકાસ્પદ ટ્રેલરને રોકવાનો પ્રયાસ કરનાર પોલીસ કોન્સટેબલને કચડી નાંખવામાં આવતાં પોલીસબેડામાં ચકચાર મચી જવા પામી હતી.

પ્રાપ્ત માહિતી અનુસાર આણંદના બોરસદમાં હિટ એન્ડ રનની ઘટનામાં ટ્રેલરને રોકવા જતાં પોલીસકર્મી પર ટ્રેલર ફેરવી કચડી નાખવામાં આવ્યો હતો. આ ઘટનામાં પોલીસકર્મીનું મોત નિપજ્યું હતું. આણંદ (Anand) જિલ્લાના બોરસદ (Borsad) માં પોલીસ (Police) જવાનો નાઈટ ડ્યુટી દરમિયાન હાઈવે પર શંકાસ્પદ વાહનોની તપાસ કરી રહ્યા હતા ત્યારે એક શંકાસ્પદ ટ્રકને પોલીસ જવાને રોકવાનો ઇશારો કર્યો હતો ત્યારે ટ્રક ડ્રાઈવરે બ્રેક મારીને ટ્રક રોકી દેવાને બદલે ટ્રકનો પૂરપાટ દોડાવી મૂકી હતી અને પોલીસ જવાનને કચડી નાખી ફરાર થઈ ગયો હતો. આ ઘટનામાં ગંભીર રીતે ઈજાગ્રસ્ત થયેલ ટ્રાફિક પોલીસમાં ફરજ બજાવતા કિરણસિંહ રાજ નામના પોલીસ જવાને ગંભીર હાલતમાં તાત્કાલિક સારવાર માટે ખસેડવામાં આવ્યો હતો. જ્યારે જવાનને કચડીને ફરાર થઈ ગયેલા ટ્રક ચાલકને પકડવા અન્ય પોલીસ જવાનો પાછળ ગયા હતા પણ ટ્રક ડ્રાઈવર ટ્રક માણેજ ગામ પાસે મૂકીને ફરાર થઈ ગયો હતો. પોલીસે ટ્રકનો કબજો લઈ તેના માલિકની શોધ કરવાની અને તેના આધારે આ ટ્રક કોણ ચલાવી રહ્યું હતું તે શોધવાની કવાયત શરૂ કરી છે. બીજી બાજુ સારવાર માટે દાખલ કરાયેલા જવાનનું સારવાર દરમિયાન મોત થઈ ગયું હોવાથી ટ્રક ડ્રાઈવર સામે હત્યાનો ગુનો લાખલ કરવાની તજવીજ હાથ ધરી છે.

આણંદના એસપી દ્વારા જાણકારી આપવામાં આવી હતી કે ગઈ રાત્રે બોરસદ ટાઉન પોલીસ સ્ટેશનમાં ફરજ બજાવતા કિરણસિંહ રાજ સહિતના જવાનોએ હાઈ વે પર એક શંકાસ્પદ ટ્રકને રોકવાની કોશિશ કરી હતી પણ ટ્રક ચાલકે ટ્રક રોક્યો નહોતો. આથી કિરણસિંહે પોતાની પ્રાઇવેટ કારમાં ટ્રકનો પીછો કર્યો હતો અને બગોદરા તરફ જતા હાઈવે પર ટ્રકને અંતરી તેની આગળ કાર ઉભી રાખી ટ્રકને રોકવાનો પ્રયાસ કર્યો હતો. આ વખતે પણ ટ્રક રોકવાને બદલે ટ્રક ચાલકે તેના પર ટ્રક ચડાવી દીધી હતી, જેમાં પોલીસ જવાન કિરણસિંહ રાજને ગંભીર ઇજાઓ થઈ હતી. તેને તાત્કાલિક સારવાર માટે ખસેડાયો હતો, જ્યાં સારવાર દરમિયાન તેનું મોત થઈ ગયું છે. બીજી બાજુ ફરાર ટ્રક ચાલકની શોધ કરતાં તે ટ્રકને માણેજ ગામ પાસે બીનવારસી મુકીને ફરાર થઈ ગયો છે. આ ટ્રકને જપ્ત કરી ટ્રક ડ્રાઈવરની શોધખોળ શરૂ કરી છે.

રાંચીમાં મહિલા પોલીસ ઇન્સપેક્ટરની હત્યા..
ઝારખંડના પાટનગર રાંચીમાં એક મહિલા પોલીસકર્મીની ગાડીથી કચડીને હત્યા કરી દેવામાં આવી હતી. આ ઘટના રાંચીના તુપુદાના પોલીસ મથક હદના હુલહૂંડુની છે. જે સમયે આ ઘટના ઘટી ત્યારે મહિલા સબ ઈન્સ્પેક્ટર સંધ્યા ટોપનો વાહન ચેકિંગ કરી રહી હતી. અચાનક ત્યારે જ અપરાધીઓએ તેમને પિકઅપ વેનથી કચડી નાખ્યા. જેમાં તેમનું મોત નિપજ્યું હતું.
સંધ્યા ટોપનો 2018 બેચના અધિકારી હતા. આ ઘટના આજે વહેલી સવારે 3 વાગ્યાની આસપાસની છે. એસઆઈની હત્યાની સૂચના મળ્યા બાદ પોલીસ મથક પ્રભારી સહિત અનેક પોલીસકર્મીઓ ઘટનાસ્થળે પહોંચી ગયા. ઘટનાને અંજામ આપ્યા બાદ અપરાધી વાહન લઈને ફરાર થઈ ગયા. જો કે આરોપી હાલ પોલીસની પકડમાં આવી ગયો છે. પોલીસ આસપાસના સીસીટીવી ફૂટેજ પણ ફંફોળી રહી છે. ઘટનાની જાણકારી આપતા રાંચીના એસએસપીએ જણાવ્યું કે આરોપીની ધરપકડ કરી લેવાઈ છે અને વાહન પણ જપ્ત કરાયું છે.

મેવાતમાં DSP ને માફિયાએ ડમ્પરથી કચડી નાખ્યા
હરિયાણાના મેવાતમાં ખનન માફિયાઓએ એક ડીએસપીની હત્યા કરી નાખી છે. ડીએસપી સુરેન્દ્ર સિંહ બિશ્નોઈ ખનન માફિયાઓ સામે કાર્યવાહી કરવા માટે ગયા હતા. આ દરમિયાન ડેપ્યુટી એસપી ઉપર ડમ્પર ચડાવી દીધુ અને તેમનું ઘટનાસ્થળે જ મોત નિપજ્યું હતું. નૂંહના તવાડુના ડેપ્યુટી એસપી પદ પર સુરેન્દ્ર સિંહ તૈનાત હતા. એવું કહેવાય છે કે સુરેન્દ્ર સિંહે પથ્થર ભરેલા એક ડમ્પરને રોકવાની કોશિશ કરી હતી. ત્યારે જ ડ્રાઈવરે ડમ્પર તેમના પર ચડાવી દીધુ. અત્રે જણાવવાનું કે ડેપ્યુટી એસપી સુરેન્દ્ર સિંહ આ વર્ષે રિટાયર થવાના હતા. પચગાંવના પહાડી વિસ્તારમાં ડેપ્યુટી એસપીનો મૃતદેહ મળ્યો છે.