ગુજરાત વિધાનસભા ચૂંટણીને લઇને કોંગ્રેસે રાજસ્થાનના મુખ્યમંત્રી ગેહલોતને આપી મોટી જવાબદારી, જાણો

કોંગ્રેસે હિમાચલ પ્રદેશ અને ગુજરાત વિધાનસભા ચૂંટણી માટે નિરીક્ષકની જાહેરાત કરી છે. પાર્ટી અધ્યક્ષ સોનિયા ગાંધીએ રાજસ્થાનના મુખ્યમંત્રી અશોક ગેહલોતને ગુજરાતમાં વરિષ્ઠ નિરીક્ષક બનાવ્યા છે. સાથે જ તેમની સાથે બે નિરીક્ષકોની પણ નિમણૂક કરવામાં આવી છે. જેમાં છત્તીસગઢના મંત્રી ટીએસ સિંહ દેવ અને મહારાષ્ટ્રના નેતા મિલિંદ દેવરાનું નામ છે.

હિમાચલ પ્રદેશમાં છત્તીસગઢના મુખ્યમંત્રી ભૂપેશ બઘેલને વરિષ્ઠ નિરીક્ષક તરીકે નિયુક્ત કરવામાં આવ્યા છે. તેમની સાથે રાજસ્થાનના પૂર્વ ઉપમુખ્યમંત્રી સચિન પાયલટ અને પંજાબના વરિષ્ઠ નેતા પ્રતાપ સિંહ બાજવાને નિરીક્ષક બનાવવામાં આવ્યા છે. છેલ્લી ગુજરાત વિધાનસભાની ચૂંટણીમાં ગેહલોતે ઘણું સારું પ્રદર્શન કર્યું હતું. આગામી કેટલાક મહિનામાં બંને રાજ્યોમાં વિધાનસભાની ચૂંટણીઓ યોજાવા જઈ રહી છે. આ માટે પાર્ટીએ તૈયારીઓ શરૂ કરી દીધી છે. ભાજપ હાલમાં ગુજરાત અને હિમાચલમાં સત્તા પર છે. અરવિંદ કેજરીવાલની આમ આદમી પાર્ટી (AAP) પણ બંને રાજ્યોમાં સતત પ્રચાર કરી રહી છે. આવી સ્થિતિમાં કોંગ્રેસ સામે મોટો પડકાર છે.