કંગના રનૌતની ફિલ્મ ‘ઇમરજન્સી’ રિલીઝ પહેલા વિવાદમાં, કોંગ્રેસે ઇન્દિરા ગાંધીની છબી બગાડવાનો આક્ષેપ કર્યો

હિન્દી સિનેમાની દિગ્ગજ અભિનેત્રી કંગના રનૌતની આગામી ફિલ્મ ઈમરજન્સી આ દિવસોમાં ચર્ચાનો વિષય બની રહી છે. અહેવાલો અનુસાર, કંગનાની ઈમરજન્સીને લઈને ઈન્ડિયન નેશનલ કોંગ્રેસ (આઈએનસી) દ્વારા વાંધો ઉઠાવવામાં આવ્યો છે. સાથે જ પાર્ટીએ કંગના રનૌત સામે મોટી શરત મૂકી છે. જાણવા મળે છે કે કંગનની આ ફિલ્મમાં પૂર્વ પીએમ ઈન્દિરા ગાંધીના શાસન દરમિયાન 1975-77ના સમયગાળા દરમિયાન દેશમાં ઇમરજન્સીની વાર્તા બતાવવામાં આવશે.

મધ્યપ્રદેશમાં કોંગ્રેસ પાર્ટીએ બોલિવૂડ અભિનેત્રી કંગના રનૌતની ઈમરજન્સી સામે વાંધો ઉઠાવ્યો છે. કોંગ્રેસનું કહેવું છે કે ફિલ્મ ઈમરજન્સીમાં પૂર્વ વડાપ્રધાન ઈન્દિરા ગાંધીની ઈમેજને બદનામ કરવાનો પ્રયાસ કરવામાં આવ્યો છે. એવું કહેવામાં આવી રહ્યું છે કે મધ્ય પ્રદેશ કોંગ્રેસે કંગના રનૌતની સામે એક શરત મૂકી છે કે તેને પહેલા ઈમરજન્સી ફિલ્મ બતાવવામાં આવે. આ સિવાય MP કોંગ્રેસના મીડિયા વિભાગના ઉપાધ્યક્ષ સંગીતા શર્માએ પણ કહ્યું છે કે ‘કંગના રનૌત ભાજપની એજન્ટ છે અને સત્તાધારી પક્ષના ઈશારે પૂર્વ પીએમ ઈન્દિરા ગાંધીની છબી સાથે ખેલ કરવાનો પ્રયાસ કરી રહી છે.’

કોંગ્રેસ પર કટાક્ષ કરતા રાજ્યના બીજેપી પ્રવક્તા રાજપાલ સિંહનું માનવું છે કે ફિલ્મ ઈમરજન્સીનું ટીઝર જોયા બાદ વિરોધ પક્ષમાં હોબાળો મચી ગયો છે. કારણ કે પૂર્વ વડાપ્રધાન ઈન્દિરા ગાંધીના શાસનકાળમાં દેશ પર ઈમરજન્સીનો કાળો ડાઘ લાદવામાં આવ્યો છે. કંગના રનૌતની ફિલ્મ ઈમરજન્સીનું ટીઝર રિલીઝ થઈ ચૂક્યું છે, જેમાં કંગના ઈન્દિરા ગાંધીના લૂકમાં જોવા મળી રહી છે.