સટ્ટાબેટિંગમાં ક્રાઇમબ્રાન્ચનો ‘લક્ષ’ વેધ..!! રાકેશ રાજદેવનો હિસાબ સાચવતો લક્ષ ગોવાથી ઝડપાયો…

સુરત, તા.18 માર્ચ…
સુરત પોલીસની આર્થિક ગુના નિવારણ શાખાએ 7500 કરોડના સટ્ટાબેટિગનો પર્દાફાશ કરી બુકીઓની દુનિયામાં ભૂકંપ લાવી નાંખ્યો છે. આ કેસ બાદ ગુજરાતના સટ્ટાકિંગ કહેવાતા રાકેશ રાજદેવ સહિતને ભાગમભાગ કરવાની નોબત આવી છે. સુરત ઇકો સેલની તરાહે અમદાવાદ ક્રાઇમ બ્રાન્ચ દ્વારા 1400 કરોડની સટ્ટાખોરીનો પર્દાફાશ કરાયો હતો. સુરત ઇકો સેલ અને અમદાવાદ ક્રાઇમ બ્રાન્ચે કરેલા બે ઐતિહાસિક કેસીસના પગલે નેશનલ એજન્સીઓએ પણ તપાસમાં ઝંપલાવ્યું છે. ઈ. ડી. અને ઇન્કમ ટેક્ષ સહિતની એજન્સી પણ તપાસમાં જોડાઇ છે. તો બીજી તરફ રાકેશ રાજદેવ ના હિસાબ કિતાબ સંભાળતા લક્ષ નામના શખ્સની પોલીસે ગોવાથી ધરપકડ કરી સંકજો કસ્યો છે.

અમદાવાદ ક્રાઇમ બ્રાન્ચ દ્વારા ગુજરાતના ઈતિહાસના સૌથી મોટા સટ્ટાકિંગ રાકેશ રાજદેવ ઉર્ફે આર.આર. ઉપર પોલીસે ગાળિયો વધુ કસ્યો છે. સટ્ટાકિંગ રાકેશ રાજદેવ વિરુદ્ધ અમદાવાદ ક્રાઈમ બ્રાન્ચે કાર્યવાહી શરૂ કરી છે. વર્ષોથી વિદેશ બેઠા બેઠા ચાલતા આ નેટવર્કમાં રૂ.1414 કરોડના હવાલા પડ્યાની આશંકા બાદ રાકેશ રાજદેવ પર ક્રાઈમ બ્રાન્ચમાં ફરિયાદ નોંધાઈ છે. આ પહેલા સુરત ઇકો સેલ 7500 કરોડના રેકેટનો પર્દાફાશ કરી રાજદેવને વોન્ટેડ જાહેર કરી ચૂકી હતી.

ઉપરા છાપરી બે મોટા કેસ થતાં સર્જાયેલા તણાવ અને ગરમ વાતાવરણ વચ્ચે દુબઈમાં શેખ સાથે માથાકૂટ થતા સટ્ટાકિંગ રાકેશ રાજદેવ લંડન જતો રહ્યો હોવાની પણ ચર્ચાએ પણ જોર પકડ્યું છે. આવાાં સટ્ટાકિંગ રાકેશ રાજદેવનો ભારતમાં હિસાબ કિતાબ પર દેખરેખ રાખતો લક્ષ નામના શખ્સને પોલીસે ગોવાથી દબોચી લેતા આ કેસમાં અનેક મોટા ખુલાસા થવાની સંભાવના કેળવાઈ રહી છે.

સટ્ટા કાંડના રેકેટમાં રાકેશ રાજદેવ આર.આર અને ઓન વોલ્સ 777 નામની એપ બનાવડાવી હતી. આ એપમાં જુદા જુદા બુકીઓ પાસેથી ડિપોઝિટ લઈ આ એપનું આઈડી અને પાસવર્ડ આપતો હતો. જેના ઉપર બુકીઓ ઓનલાઈન સટ્ટો રમતા હતા. જ્યારે આ એપમાં લોગ ઈન કરનારા બુકીઓ પાસેથી પૈસા જુદા જુદા બેંક એકાઉન્ટમાં ટ્રાન્સફર થતા હતા. તે તમામ બેંક એકાઉન્ટ ડમી હતા. આ તમામ ડમી બેંક એકાઉન્ટ કર્મેશ પટેલ અને હરિકેશ પટેલે ખોલાવડાવ્યા હતા. આ એકાઉન્ટમાં ટ્રાન્સફર થયેલા પૈસા આ બંને લોકો હવાલા મારફતે દુબઈ મોકલતા હતા, જેથી આ આખા રેકેટની સૌથી મોટી કડી હરિકેશ અને કર્મેશ હોવાનું અમદાવાદ ક્રાઈમ બ્રાંચના અધિકારીઓનું કહેવું છે. જેથી આ બંને શખ્સો અંડર ગ્રાઉન્ડ થઈ જતાં તેની શોધખોળ હાથધરી છે.

દુબઈથી ક્રિકેટ સટ્ટાનું નેટવર્ક ચલાવતા રાકેશ રાજદેવ ઉર્ફે આર. આર.એ દેશભરમાં બુકીઓનું નેટવર્ક ઊભું કર્યું હતું. ક્રાઈમ બ્રાન્ચે ચાર મહિના પહેલાં સોલામાંથી બુકી મેહુલ પૂજારાની ધરપકડ કરી હતી. જ્યારે આર.આર.ના નેટવર્કની તપાસ કરવા ક્રાઈમ બ્રાન્ચે અન્ય એજન્સીઓની તેમ જ રાજ્ય બહારની પોલીસની પણ મદદ લીધી છે. અમદાવાદ ક્રાઈમ બ્રાન્ચે આરોપી રાકેશ અને ટોમી ઊંઝા સામે લુક આઉટ નોટિસ જાહેર કરી છે અને 20થી વધુ બેંકના એકાઉન્ટની માહિતી મેળવી સટ્ટાના નેટવર્કને તોડવા આગળની કાર્યવાહી

મહત્વનું છે કે ગત તા. 17 ઓકટોબરે થયેલી એક રેડ બાદ સમગ્ર મામલો બહાર આવ્યો જેમાં સોલા વિસ્તારમાં રહેતા મેહુલ પૂજારાના ઘરે દરોડા પાડવામાં આવ્યા હતા. જેમાં બુકીઓ વેબસાઈટમાંથી આઈડી થકી કમિશન મેળવતા હોવાનું ખૂલ્યું હતું. ત્યાર બાદ અમદાવાદ ક્રાઈમ બ્રાન્ચે તપાસનો દોર ઝડપી બનાવી ઓક્ટોબર અને ડિસેમ્બર મહિનામાં ક્રિકેટ સટ્ટા રમાડતા પંટરોને પકડી પાડયા હતા. જેની પાસેથી મળેલા લેપટોપ, મોબાઈલ સહિત અન્ય દસ્તાવેજોની તપાસ કરતા કરોડોના ટ્રાન્જેક્શન થયા હોવાનું સામે આવતા ક્રાઇમ બ્રાંચ દ્વારા વધુ ઉંડાણપૂર્વક તપાસ હાથ ધરવામાં આવી હતી.