UKમાં આ શહેરના મેયર બન્યા વડોદરાના પૂર્વ શિક્ષિકા, હજી પણ યાદ કરે છે ગુજરાતની આ વાત …

વેપાર-ધંધા કે શિક્ષણાર્થે વિદેશ જનારા ભારતીયો તેમની આવડત, કુનેહ અને સેવાકીય કાર્યોના કારણે નામના મેળવતાં આવ્યા છે. ઘણાં ભારતીયો વિદેશમાં રાજકીય, સરકારી કે ખાનગી કંપની-સંસ્થાઓમાં સર્વોચ્ચ હોદ્દાઓ શોભાવી રહ્યા છે. આવું જ કંઇ વડોદરાના પૂર્વ શિક્ષિકા મેરી એન્ટોનીએ પણ કરી બતાવ્યું છે. મેરી એન્ટોની UKના રોયસ્ટોન શહેરના મેયર બન્યા. મેરી એન્ટોની વડોદરાની રોઝરી સ્કૂલમાં 1995 થી 2007 સુધી શિક્ષિકા હતાં. 25 હજારની વસ્તી ધરાવતા રોયસ્ટોન ટાઉનમાં તેઓ મેયર તરીકે ચૂંટાઇને આવ્યાં. જણાવી દઇએ કે, રોયસ્ટોન ટાઉનમાં 44 ભારતીય કુટુંબો વસે છે. મેરી એન્ટોની સામુદાયિક સેવાના કારણે લોકોમાં ખૂબ લોકપ્રિય પણ છે. રોયસ્ટોનના મેયર બનનાર મેરી એન્ટોની પ્રથમ ભારતીય અને એશિયન છે.

મેરી એન્ટોની રોયસ્ટોન ટાઉન પાર્ટી સાથે જોડાયેલાં છે. તે પાર્ટીએ પ્રથમ વાર ચૂંટણીમાં ઝંપલાવ્યું હતું. મેરી એન્ટોની અનેક સંસ્થાઓ સાથે જોડાયેલાં છે અને વડીલો-બીમારોની સેવા કરે છે. તેમના પતિ ડો. રોબિન IPCL સાથે જોડાયેલા હતા. તેમને રિયા અને રિવ નામનાં બે સંતાનો છે.

મીડિયા સમક્ષ વડોદરાનાં સંસ્મરણ વાગોળતાં તેઓ જણાવે છે કે, ‘વડોદરામાં ગરબાનું સંગીત મને ખૂબ ગમતું હોવાથી હું તેને જોવા જતી. વડોદરાના ડો. રોબિન સાથે લગ્ન કર્યા બાદ રોયસ્ટોનમાં જ અમે સ્થાયી થઇ ગયાં. આ શહેર ખૂબ જ હરિયાળુ છે અને વેપારનું પણ કેન્દ્ર હોવાથી આસપાસનાં ઘણાં ગામોના લોકો અહીં ખરીદી કરવા આવે છે. ગુજરાતની રીત-ભાત મને ખૂબ પસંદ છે. ગુજરાતીઓ ભલે વેપારી તરીકે જાણીતા હોય પરંતુ પરંપરા, સંસ્કૃતિ પ્રત્યેનો તેમનો પ્રેમ, સમાજ પ્રત્યેનું કમિટમેન્ટ અને સેવાભાવી સ્વભાવ મને હંમેશા આકર્ષતો રહ્યો છે. રોયસ્ટોન લંડનથી 50 કિમીના અંતરે આવેલું છે.’