રાજસ્થાનમાં ઇન્ટરનેટ બંધ, હત્યા કરનારા આરોપીઓનો આ સંગઠન સાથે છે સંબંધ

ઉદયપુર હત્યાકાંડમાં મોટો ખુલાસો થયો છે. બંને આરોપીઓના સંબંધ ‘ઈસ્લામિક દાવતે’ સંગઠન સાથે હોવાનું કહેવાય છે. સૂત્રોના જણાવ્યા અનુસાર, ઉદયપુરમાં ધોળે દિવસે કન્હૈયાલાલનું માથું કાપીને હત્યા કરનારા બંને આરોપી મોહમ્મદ રિયાઝ અને ગૌસ મોહમ્મદ ‘ઈસ્લામી દાવતે’ નામના સંગઠન સાથે સંકળાયેલા છે. હત્યા કર્યા બાદ બંને અજમેર દરગાહ જવા રસ્તે હતા. હત્યા બાદ અજમેર દરગાહ ઝિયારત માટે રવાના થયા અને અધવચ્ચે જ પકડાઈ ગયા. બંને હાલ પોલીસની કસ્ટડીમાં છે. સુરક્ષાના કારણોસર પોલીસ બંને આરોપીઓને પૂછપરછ માટે ઉદયપુરની બહાર અજાણ્યા સ્થળે લઈ ગઈ છે. હાલ રાજસ્થાનમાં સ્થિતિ અત્યંત તંગ છે. સંવેદનશીલ વિસ્તારોમાં ઈન્ટરનેટ સેવાઓ બંધ કરી દેવામાં આવી છે. રાજ્યના તમામ જિલ્લાઓમાં આખા મહિના માટે કલમ 144 લાગુ કરવામાં આવી છે. NIAની ટીમ આ કેસની તપાસમાં લાગેલી છે.

મુખ્ય સચિવ ઉષા શર્માએ તમામ વિભાગીય કમિશનરો, પોલીસ મહાનિરીક્ષક અને જિલ્લા કલેક્ટરને સમગ્ર રાજ્યમાં વિશેષ તકેદારી અને સાવચેતી રાખવાનો નિર્દેશ આપ્યો છે. કાયદો અને વ્યવસ્થા જાળવવા માટે મુખ્ય સચિવે સમગ્ર રાજ્યમાં આગામી 24 કલાક માટે ઈન્ટરનેટ બંધ રાખવાનો નિર્દેશ આપ્યો હતો, તમામ જિલ્લાઓમાં આગામી એક મહિના માટે કલમ 144 લાગુ કરી હતી, ચારથી વધુ લોકોના એકઠા થવા પર પ્રતિબંધ મૂક્યો હતો, પોલીસ અને તમામ અધિકારીઓની રજાઓ રદ કરવા, શાંતિ સમિતિની બેઠકો યોજવા અને ઉદયપુર જિલ્લામાં જરૂરિયાત મુજબ કર્ફ્યુ લાદવાની સૂચનાઓ આપવામાં આવી છે.

મુખ્ય સચિવે તમામ ડિવિઝનલ કમિશનરોને મોબાઈલ અને અન્ય માધ્યમો દ્વારા ઉદયપુરની ઘટનાના વીડિયોના પ્રસારણને કડક રીતે રોકવાનો નિર્દેશ આપ્યો છે. આ સાથે વિડિયો પ્રસારિત કરનારા લોકો સામે નિયમ મુજબ કાર્યવાહી સુનિશ્ચિત કરવી જોઈએ. તેમણે કહ્યું કે સાંપ્રદાયિક સૌહાર્દ અને શાંતિ જાળવવામાં સહકાર આપવા માટે ધાર્મિક નેતાઓને અપીલ કરવી જોઈએ.

આ ઘટના પર રાજકારણ પણ ગરમાયું છે. રાજસ્થાનના મુખ્યપ્રધાન અશોક ગેહલોત દેશમાં તણાવને લઈને વડાપ્રધાન નરેન્દ્ર મોદી પર પ્રહારો કરી રહ્યા છે. જ્યારે ભાજપ હવે ગેહલોત સરકારની સરખામણી તાલિબાની રાજ સાથે કરી રહી છે.