અબૂધ બાળકી ઉપર અમાનીષી અત્યાચાર, સગી માં અને સાવકા બાપે તમાચા માર્યા, શરીરે બીડીથી ડામ દીધા અને બચકા પણ ભર્યા..

સુરત : કતારગામમાં પાંચ વર્ષની બાળકીને તેની સગી માતા તેમજ સાવકા પિતાએ અમાનુષી અત્યાચાર ગુજાર્યાની ઘટના પ્રકાશમાં આવી છે. આ બંનેએ બાળકીને બાંધી દીધી હતી, આ ઉપરાંત બીડીના ડામ લેવા સાથે ગાલ ઉપર તમાચા પણ મરાયા. આટલાથી સંતોષ નહીં થતાં માસૂમ બાળકીને પીઠના ભાગ બચકા ભરવામાં આવ્યા હતાં. આ ઘટના ચાઇલ્ડ હેલ્પ લાઇન ઉપર આવેલા કોલથી ઉજાગર થઇ હતી. આ બાબતે પોલીસે ગુનો નોંધી નિષ્ઠુર માતા-પિતાની ધરપકડ કરી હતી.

બાળકોના કલ્યાણ, બાળકોની સુરક્ષા અને તેના વિકાસને ધ્યાને રાખીને સરકાર દ્વારા શરૂ કરવામાં આવેલા ચાઇલ્ડ હેલ્પલાઇન નંબર – 1098માં એક ફોન આવ્યો હતો, જેમાં જણાવ્યું હતું કે, કતારગામમાં એક માતા-પિતા તેના પાંચ વર્ષના બાળકનું શોષણ કરીને તેની ઉપર અત્યાચાર કરી રહ્યો છે. આ બાબતે ચાઇલ્ડ હેલ્પ લાઇનમાં ફરજ બજાવતા રેખાબેન હરીશભાઇ નેમાડે અને તેમની ટીમ દ્વારા કતારગામ પોલીસને સાથે રાખીને તપાસ કરવામાં આવી હતી.

પોલીસે પાંચ વર્ષની બાળકી નામે યશ્વી અને તેની નામે મોનાલીબેન અને બાળકીના સાવકા પિતા પરેશભાઇ હિંગુને પોલીસ મથકે લઇ આવ્યા હતા. બાળકીના શરીર ઉપર ઠેર-ઠેર ઇજા જોવા મળી હતી. માતા-પિતાએ કશું કહ્યું ન હતું, ત્યારબાદ બાળકીને એકલામાં લઇ જઇને પુછવામાં આવતા બાળકીએ રડતા રડતા કહ્યું કે, મારા માતા-પિતાએ બે દિવસથી મારા હાથ-પગ બાંધીદીધા છે, મને ગાલ ઉપર ચીમટા ભરે છે અને તમાચા પણ મારે છે, મારા પિતાએ મારી પીઠના ભાગે બચકા ભર્યા છે, તેમજ હાથ ઉપર બીડીના ડામ દીધા છે. ચાઇલ્ડ હેલ્પલાઇનની ટીમ આ વાત સાંભળીને ચોંકી ઉઠી હતી. તેઓએ બાળકીને તાત્કાલીક સારવાર કરાવી હતી અને નિષ્ઠુર માતા-પિતાની સામે કતારગામ પોલીસમાં ફરિયાદ આપી હતી. પોલીસે બનાવ અંગે ગુનો નોંધી મોનાલીબેન તેમજ પરેશભાઇની સામે ગુનો નોંધી તેની ધરપકડ કરી હતી.