ગુજરાતમાં કોંગ્રેસની જીત મુશ્કેલ? કોંગ્રેસના આ નેતાએ જ માની લીધું કે…

ગુજરાતમાં યોજાનારી વિધાનસભા ચૂંટણીને લઈને કોંગ્રેસ પાર્ટીના નેતા મિલિંદ દેવરાનું મોટું નિવેદન સામે આવ્યું છે. તેમણે આ અંગે કહ્યું છે કે ગુજરાત વિધાનસભાની ચૂંટણીમાં કોંગ્રેસ માટે જીતવું મુશ્કેલ છે. આ સાથે તેણે એમ પણ કહ્યું કે આ એવો પડકાર નથી જે જીતી ન શકાય. તેમણે કહ્યું કે એક વખત નોટબંધી પછી વાતાવરણ સર્જાયું હતું, જ્યારે કોંગ્રેસ પાર્ટી ચૂંટણી જીતવાની નજીક પહોંચી ગઈ હતી.

આ વર્ષના અંતમાં યોજાનારી ગુજરાત વિધાનસભાની ચૂંટણીઓ માટે ઓલ ઈન્ડિયા કોંગ્રેસ કમિટી (AICC) ના નિરીક્ષક તરીકે નિયુક્ત કરાયેલા દેવરાએ જણાવ્યું હતું કે નોટબંધી પછી સત્તા વિરોધી લહેર વચ્ચે પાર્ટી પાંચ વર્ષ પહેલા ગુજરાતની ચૂંટણી જીતવાની નજીક પહોંચી ગઈ હતી. વડા પ્રધાન નરેન્દ્ર મોદી અને કેન્દ્રીય ગૃહ પ્રધાન અમિત શાહના ગૃહ રાજ્ય ગુજરાતમાં, ભાજપ 1998 થી સત્તામાં છે, જ્યારે કોંગ્રેસ 1995 થી એક પણ વિધાનસભા ચૂંટણી જીતી શકી નથી. 2017માં કોંગ્રેસે 77 બેઠકો જીતી હતી જ્યારે ભાજપે 99 બેઠકો જીતી હતી.

મિલિન્દ દેવરાએ જણાવ્યું હતું કે પાયાના સ્તરે એકતા રહે અને અગાઉની ચૂંટણીઓમાં અમને અસર કરી હોય તેવી ભૂલોનું પુનરાવર્તન ન થાય તે સુનિશ્ચિત કરવા માટે યોગ્ય વ્યૂહરચના ઘડવા માટે હું રાજસ્થાનના મુખ્યમંત્રી અશોક ગેહલોત સાથે મળીને કામ કરીશ. તેમણે કહ્યું કે નિરીક્ષકની ભૂમિકા એ સુનિશ્ચિત કરવાની છે કે વસ્તુઓ સરળતાથી આગળ વધે. તેમણે કહ્યું કે તેઓ સુનિશ્ચિત કરશે કે આ વખતે ચૂંટણી જીતવામાં કોઈ કસર બાકી ન રહે.