વિદેશ જવાની ઘેલછા, હાઇપ્રોફાઇલ લાઇફ સ્ટાઇલ માટે વાહન ચોરીના રવાડે ચઢેલો યુવક ઝડપાયો, ચોરીની 19 ઘટનાનો ભેદ ઉકેલાયો

સુરત: રાંદેર પોલીસે એક એવા ચોરની ધરપકડ કરી છે કે જે તેની સરનેમ દુબઇવાલાને સાર્થક કરવા માટે વાહન ચોરતો હતો. વિદેશ જવાની ઘેલછા સંતોષવા માટે આવશ્યક રુપિયા એકત્ર કરવા તેણે 19 જેટલા વાહનો ચોરી કર્યા હતાં. શહેરના જુદા જુદા વિસ્તારમાંથી ચોરેલા વાહનો તે અન્ય રાજ્યોમાં જઇ વેચી દેતો હતો.

એસીપી ઝેડ આર દેસાઇએ જણાવ્યું હતું કે વાહનચોરી, મોબાઇલ ચોરી, ધરફોડ ચોરી, જુગાર પ્રોહીબિશન તથા શરીર સંબંધી વણ શોધાયેલ ગુન્હાઓ શોધી કાઢવા માટે પોલીસ કમિશનર દ્વારા સુચના અપાઈ હતી. ત્યારે રાંદેર પોલીસ સ્ટેશનના સર્વેલન્સ સ્ટાફને બાતમીના આધારે રાંદેર ઉગત બોટનિકલ ગાર્ડન પાસે વોચ ગોઠવી એક યુવકને અટકાયતમાં લીધો હતો.પકડાયેલ યુવક સાજીદ ઉર્ફે સાજીદ દુબઈવાલા મજીદ શેખ સુરતના મોમનાવાડ ખાડી, ગોપીપુરાનો અને મૂળ નિઝામપુર મહારાષ્ટ્રનો રહેવાસી છે. તેની પૂછપરછમાં તેને 18 અનડીટેકટ ગુનાઓની કબૂલાત કરી હતી. સાથે જ અલગ અલગ કુલ્લે 19 મોટરસાયકલ અને મોપેડ મુદામાલ રીકવર કરવામાં આવ્યો હતો.

સાજીદ હાઈપ્રોફાઈ જીવનશૈલી જીવવા માટે સુરત શહેરના અલગ અલગ ધાર્મિક સ્થળ, બાગ બગીચા તેમજ જાહેર જગ્યાઓ પર ફરી તકનો લાભ લઈ વાહનો ચોરી કરતો હતો. સાજીદે મોટાભાગ ના વાહનો રાંદેર, અડાજણ અને સલાબતપુરા પોલીસ સ્ટેશન વિસ્તારમાંથી ચોર્યા હોવાનું સામે આવ્યું છે. ચોરેલા વાહનો અલગ અલગ અવાવરૂ જગ્યાઓ પર સંતાડી રાખી અનુકુળ સમયે વાહનોને ગુજરાત તેમજ ગુજરાત બહાર વેચાણ કરતો હતો. વાહન ચોરી કરી તેને વેચી મોટા પ્રમાણમાં રૂપિયા મેળવી દેશ-વિદેશમાં ફરવાની ઈચ્છા રાખતો હતો.
પોલીસ તપાસમાં સાજીદે એવી કબૂલાત કર્યાનું કહેવાય છે કે તેને હાઈપ્રોફાઈ જીવન શૈલીનો શોખ છે. તેણે વિદેશ પણ જવું હતું. ખાસ વિદેશ જવા માટે જરુરી રુપિયાની વ્યવસ્થા કરવા માટે તેણે 19 વાહનો ચોરી કર્યા હતાં. સુરતમાંથી ચોરેલા વાહનો તે અન્ય રાજ્યોમાં વેચવાનું પ્લાનિંગ કરતો હતો.