આવતાં વર્ષે ચીનને પાછળ કરી ભારત બનશે સૌથી વધુ વસ્તી ધરાવતો દેશ, યુએનના રિપોર્ટમાં ખુલાસો

ચીન અને ભારત વિશ્વના બે સૌથી વધુ વસ્તી ધરાવતા દેશો છે. અત્યારે આ બાબતમાં ચીન પ્રથમ સ્થાને છે, જ્યારે ભારત તેની પાછળ બીજા સ્થાને છે. જો કે, આ સ્થિતિ લાંબો સમય આ રીતે રહેવાની નથી. યુનાઈટેડ નેશન્સે આ સંદર્ભમાં એક નવો રિપોર્ટ જાહેર કર્યો છે. રિપોર્ટ અનુસાર, આવતા વર્ષ સુધીમાં ભારત ચીનને પછાડીને સૌથી વધુ વસ્તીના મામલે પ્રથમ સ્થાને પહોંચી જશે.

સંયુક્ત રાષ્ટ્રએ સોમવારે ‘વિશ્વ વસ્તી દિવસ’ના અવસર પર આ રિપોર્ટ જાહેર કર્યો. રિપોર્ટ અનુસાર નવેમ્બર 2022ના મધ્ય સુધીમાં વિશ્વની વસ્તી 8 અબજ થવાનો અંદાજ છે. જો આપણે ખંડો પર નજર કરીએ, તો એશિયા 4.7 અબજની વસ્તી સાથે ટોચ પર છે. એકલા એશિયામાં વિશ્વની 61 ટકા વસ્તી છે. આ પછી, 1.3 અબજ લોકો એટલે કે 17 ટકા વસ્તી આફ્રિકામાં રહે છે. આ સિવાય યુરોપ (લેટિન અમેરિકા અને કેરેબિયન)માં 750 મિલિયન એટલે કે 10 ટકા, લેટિન અમેરિકા અને કેરેબિયનમાં 650 મિલિયન એટલે કે 8 ટકા, ઉત્તર અમેરિકામાં 370 મિલિયન અને ઓશનિયામાં 43 મિલિયન લોકો વસે છે.

વર્લ્ડ પોપ્યુલેશન પ્રોસ્પેક્ટ્સ 2019 મુજબ, ચીન હાલમાં 1.44 અબજની વસ્તી સાથે પ્રથમ ક્રમે છે, જ્યારે બીજા ક્રમે ભારતની વસ્તી 1.39 અબજ છે. વિશ્વની વસ્તીમાં ચીનનો હિસ્સો 19 ટકા અને ભારતનો 18 ટકા છે. રિપોર્ટ અનુસાર વર્ષ 2023 સુધીમાં ભારતની વસ્તી ચીન કરતા વધી જશે. રિપોર્ટમાં કહેવામાં આવ્યું છે કે વર્ષ 2019 થી 2050 દરમિયાન ચીનની વસ્તીમાં 31.4 મિલિયન એટલે કે લગભગ 2.2 ટકાનો ઘટાડો થશે.

સંયુક્ત રાષ્ટ્રના આર્થિક અને સામાજિક બાબતોના વિભાગની આગાહી અનુસાર, વિશ્વની વસ્તી હાલમાં 1950 પછી સૌથી ધીમી ગતિએ વધી રહી છે. આગાહી મુજબ, વર્ષ 2030 સુધીમાં વિશ્વની વસ્તી 8.5 અબજ સુધી પહોંચી જશે. એ જ રીતે, વર્ષ 2050 સુધીમાં વિશ્વની કુલ વસ્તી 9.7 અબજ અને 2080ના દાયકામાં લગભગ 10.4 અબજ સુધી પહોંચી જશે. રિપોર્ટ અનુસાર, આ પછી વિશ્વની વસ્તી 2100 AD સુધી આ સ્તર પર રહેશે.