OMG! પબજી ગેમ માટે સગીરે માતાને ગોળી મારી લાશ 3 દિવસ ઘરમાં છૂપાવી, મિત્રો સાથે પાર્ટી પણ કરી…

નવી દિલ્હી: ઓનલાઇન ગેમ બાળમાનસ ઉપર ખૂબ જ ઉંડી છાપ છોડી રહી છે. તેમાંય મારધાડ વાળી ગેમ બાળકોના માનસને અગ્રેસીવ, ગુનાઇત બનાવી રહી છે. મરવું, મારવું સહજ બનાવી દેતી આ ગેમ બાળકોને ગુનાખોરીના માર્ગે વાળી રહી છે. મારામારી, ચોરી, ઘર છોડી ભાગવું અને હત્યા સુધીના બનાવોમાં સંડોવાતાં બાળકોની તપાસમાં ગેમ કારણભૂત હોવાનું બહાર આવી રહ્યું છે. આવો જ એક હચમચાવી નાખે તેવો કિસ્સો ઉત્તર પ્રદેશથી સામે આવ્યો છે. જેમાં પબજી માટે ગાંડા થયેલા સગીરે તેની માતાને મોતને ઘાટ ઉતારી દીધી. લખનઉમાં 17 વર્ષના એક સગીરને તેની માતાએ પબજી રમવાની ના પાડતા રાતોચોળ થઈ ગયો અને માતાની નિર્મમ રીતે ગોળી મારી હત્યા કરી નાખી.

મળતી માહિતી મુજબ લખનઉમાં રહેતાં તરુણે તેના પિતાની લાઈસન્સવાળી રિવોલ્વરથી માતાને ગોળી મારી દીધી. વધું આઘાતજનક બાબત એ છે કે માતાને ગોળી મારી તે અટક્યો ન હતો. આ તરુણે માતાના મૃતદેહને ઘરના એક ઓરડામાં છૂપાવી દીધો. મૃતદેહ સડવા માંડે અને દુર્ગંધ આવશે એવું પણ તે જાણતો હતો. આ સ્થિતિથી બચવા માટે તરુણે રૂમમાં પાછું રૂમ ફ્રેશનર પણ છાંટ્યે રાખ્યું. છોકરાએ તેની 10 વર્ષની બહેનને પણ ધમકાવી અને ત્રણ દિવસ સુધી ઓરડામાં પૂરી રાખી. તેની નિર્લજ્જતા તો જુઓ આવા માહોલમાં તેણે તેના મિત્રોને પાર્ટી માટે બોલાવ્યા અને પછી માતા વિશે પૂછ્યું તો કહ્યું કે તેની માતા એક સંબધીને મળવા માટે ગઈ છે.

જો કે મૃતદેહ તેનું કામ કરે જ છે એ ધોરણે થોડા સમયમાં જ ઘરમાંથી માથું ફાટી જાય તેવી દુર્ગંધ આવવા માંડી હતી. ઘરમાં કઇંક અજુગતુ થયાની આશંકા જતા પાડોશીઓમાંથી એક જણે છોકરાના પિતાને તેની જાણ કરી. પિતા સેના અધિકારી છે અને પશ્ચિમ બંગાળમાં ફરજ બજાવે છે. પિતાએ પોલીસને જાણ કરી અને ત્યારબાદ પોલીસને મંગળવારે રાતે ઘરમાંથી 40 વર્ષની સાધનાનો ત્રણ દિવસ જૂનો મૃતદેહ મળી આવ્યો.

એસીપી અર્ચના સિંહે જણાવ્યું કે મહિલાને માથામાં ખુબ નજીકથી ગોળી મારવામાં આવી હતી. તેમના મૃતદેહને એર કન્ડીશનર રૂમમાં રાખવામાં આવ્યો હતો. જેથી કરીને દુર્ગંધ આવે નહીં. મીડિયા રિપોર્ટ્સ મુજબ પોલીસે જ્યારે આ આરોપી સગીરની પૂછપરછ કરી તો તેણે કબૂલ કર્યું કે તે પબજી રમતો હતો. આથી તેની ખુબ પીટાઈ પણ થતી હતી. ગત શનિવારે ઘરમાંથી 10 હજાર રૂપિયા ગાયબ થયા હતા. માતાએ તેના પર ચોરીનો આરોપ લગાવીને ખુબ માર્યો. જે પણ ખોટું કામ થતું તેનો આરોપ તેના પર જ લાગતો હતો. આથી નારાજ થઈને તેણે માતાની હત્યા કરી નાખી. આ માટેનો આઇડિયા અને હિંમત ગેમ રમતો હોવાથી આવી હોવાની બાળકની કબૂલાત દરેક માતા પિતા માટે લાલ બત્તી સમાન છે.