વરસાદની રાહ જોઇ રહેલા લોકોને મળશે રાહત, આગામી પાંચ દિવસમાં આ રાજ્યમાં થશે વરસાદ

દિલ્હી અને ઉત્તર પ્રદેશ સહિત કાળઝાળ ગરમી સામે ઝઝૂમી રહેલા ઉત્તર ભારતના રાજ્યો આ દિવસોમાં ચોમાસાની આતુરતાપૂર્વક રાહ જોઈ રહ્યા છે. દરમિયાન, હવામાન વિભાગ (IMD)એ ચોમાસાને લઈને સારા સમાચાર આપ્યા છે. હવામાન વિભાગે માહિતી આપી છે કે દક્ષિણ-પશ્ચિમ ચોમાસું મધ્ય અરબી સમુદ્ર, પૂર્વ ગોવા, કોંકણના કેટલાક ભાગો અને કર્ણાટકના કેટલાક ભાગોમાં આગળ વધ્યું છે. હવામાન વિભાગે કેટલાક રાજ્યોમાં આગામી 5 દિવસ સુધી વરસાદની આગાહી કરી છે.

હવામાન વિભાગ દ્વારા આપવામાં આવેલી માહિતી અનુસાર, ઉત્તર-પૂર્વ ભારત અને ઉપ-હિમાલયી પશ્ચિમ બંગાળ અને સિક્કિમમાં આગામી 5 દિવસ સુધી ભારે વરસાદની સંભાવના છે. બિહાર અને ઝારખંડમાં આગામી બે દિવસ સુધી વરસાદ પડી શકે છે.

હવામાન વિભાગે ટ્વિટ કરીને જાણકારી આપી છે કે મુંબઈમાં ચોમાસાની એન્ટ્રી થઈ ગઈ છે. મુંબઈના કેટલાક વિસ્તારોમાં આજે વરસાદ પડ્યો હતો. મુંબઈમાં ચોમાસાની એન્ટ્રી બાદ હવે દિલ્હીમાં લોકો વરસાદની રાહ જોઈ રહ્યા છે. IMD અનુસાર, ચોમાસું સારી ગતિએ આગળ વધી રહ્યું છે.

હવામાન વિભાગના જણાવ્યા અનુસાર મુંબઈમાં 14 જૂન સુધી વરસાદ અને ગાજવીજ ચાલુ રહેશે. આજે મુંબઈમાં લઘુત્તમ તાપમાન 26 ડિગ્રી અને મહત્તમ તાપમાન 34 ડિગ્રી નોંધાયું છે.

જ્યારે ઘણા રાજ્યોમાં વરસાદની અપેક્ષા છે, ત્યારે આગામી બે દિવસ સુધી ઉત્તર-પશ્ચિમ, મધ્ય અને અડીને આવેલા પૂર્વ ભારતના અલગ-અલગ ભાગોમાં ગરમીના મોજાની સ્થિતિ ચાલુ રહેવાની શક્યતા છે.