સિદ્ધુ મૂસેવાલાની હત્યાના પગલે ખાસ મિત્ર મિકા સિંહની સુરક્ષા વધારાઇ, સો.મીડિયામાં લોરેન્સ બિશ્નોઈના પેજને બૅન કરવા કરી છે ડિમાન્ડ..

લોકપ્રિય પંજાબી ગાયક સિદ્ધુ મૂસેવાલાની નિર્મમ હત્યાએ દેશભરમાં ભારે ચકચાર મચાવી છે. રશિયન રાઇફલથી અંધાધૂધ ગોળીબાર કરી સિદ્ધૂને ઘાતકી રીતે મોતને ઘાટ ઉતારી દેવાયા હવે તેના મિત્ર મિકા સિંહની સુરક્ષામાં વધારો કરાયો છે. બોલિવૂડ સિંગર મિકા સિંહ હાલમાં જોધપુરમાં પોતાના નવા શો ‘મિકા દી વોટી’નું શૂટિંગ કરી રહ્યો છે. જોધપુર કમિશનરે સિંગર મિકા સિંહની સુરક્ષામાં વધારો કર્યો છે. હોટલમાં મોટી સંખ્યામાં પોલીસ જોવા મળી હતી. સેટ પર પણ પોલીસ જવાન જોવા મળ્યા હતા. નોંધનીય છે કે મિકા સિંહ તથા સિદ્ધુ મૂસેવાલા ખાસ મિત્રો હતા. સિદ્ધુના મોત બાદ મિકા સિંહે સોશિયલ મીડિયામાં પોસ્ટ શૅર કરી હતી.

DCP ભુવન ભૂષણ યાદવે કહ્યું હતું કે પંજાબી સિંગર સિદ્ધુની હત્યા બાદ સાવચેતી માટે મિકા સિંહની સુરક્ષા વ્યવસ્થા કરવામાં આવી છે. જોકે મિકાએ આ અંગે કોઈ ડિમાન્ડ કરી નહોતી. ઉલ્લેખનીય છે કે મિકા સિંહે સિદ્ધુની હત્યા બાદ સો.મીડિયામાં એક પછી એક પોસ્ટ શૅર કરીને હત્યાની કડક શબ્દોમાં નિંદા કરી હતી. આ સાથે જ લોરેન્સ બિશ્નોઈના સો.મીડિયા પેજનો સ્ક્રિનશોટ શૅર કરીને પેજ બૅન કરવાની માગણી કરી હતી. આ પોસ્ટ બાદ જોધપુર પોલીસ અલર્ટ થઈ ગઈ હતી અને મિકાની સુરક્ષામાં વધારો કર્યો હતો.

મિકાએ સોશિયલ મીડિયામાં પોસ્ટ શૅર કરીને કહ્યું હતું, ‘હું હંમેશાં કહેતો કે મને પંજાબી હોવા પર ગર્વ છે, પરંતુ આજે મને આ વાત કહેતા શરમ આવે છે. 28 વર્ષનો યંગ ટેલન્ટેડ યુવક ઘણો જ લોકપ્રિય હતો, તેનું ભવિષ્ય ઊજળું હતું, પરંતુ પંજાબમાં પંજાબીઓએ જ તેને મારી નાખ્યો. ભગવાન તેના આત્માને શાંતિ આપે. પરિવાર પ્રત્યે સાંત્વના. હું પંજાબ સરકારને વિનંતી કરું છું કે તે ગુનેગારો વિરુદ્ધ કડક કાર્યવાહી કરે.’
અન્ય એક પોસ્ટમાં મિકાએ કહ્યું હતું, ‘મિસ યુ ભાઈ. બહુ જલદી જતો રહ્યો. લોકો હંમેશાં તારા નામ, ફૅમ તથા ઈજ્જતને યાદ કરશે. આ સાથે જ તારા તમામ હિટ રેકોર્ડ્સ પણ યાદ રહેશે. ભગવાન તારી આત્માને શાંતિ આપે. સતનામ વાહેગુરુ.’