સુપ્રીમ કોર્ટે વિજય માલ્યાને 2 હજાર રૂપિયાનો દંડ ફટકાર્યો, જાણો શું છે મામલો

સુપ્રીમ કોર્ટે વિજય માલ્યાને કોર્ટના અવમાનના કેસમાં 4 મહિનાની સજા સંભળાવી છે. આ સાથે કોર્ટે માલ્યા પર 2000 રૂપિયાનો દંડ પણ લગાવ્યો છે.

સ્ટેટ બેંક ઓફ ઈન્ડિયાએ વિજય માલ્યા સામે કોર્ટના આદેશ છતાં બાકી રકમ ન ચૂકવવા બદલ અરજી દાખલ કરી હતી. આ મામલાની સુનાવણી ત્રણ જજોના જસ્ટિસ યુયુ લલિત બેન દ્વારા કરવામાં આવી હતી. જસ્ટિસ લલિતની સાથે બેન્ચમાં જસ્ટિસ એસ રવિન્દ્ર ભટ્ટ અને જસ્ટિસ સુધાંશુ ધૂલિયાનો સમાવેશ થાય છે. કોર્ટે 10 માર્ચે માલ્યાની સજા પર પોતાનો ચુકાદો અનામત રાખ્યો હતો. સુપ્રીમ કોર્ટે 5 વર્ષ પહેલા 9 મે 2017ના રોજ વિજય માલ્યાને કોર્ટના આદેશની અવમાનના માટે દોષિત ઠેરવીને સુનાવણી શરૂ કરી હતી. વિજય માલ્યાએ તેમની સંપત્તિની સંપૂર્ણ વિગતો બેંકો અને સંબંધિત અધિકારીઓને આપી ન હતી જેમની પાસેથી તેણે કરોડો અને અબજો રૂપિયાની લોન લીધી હતી.

આ મામલામાં બેંકો અને સત્તાવાળાઓનો પક્ષ સાંભળ્યા બાદ કોર્ટે માલ્યાને 10 જુલાઈ 2017ના રોજ કોર્ટમાં હાજર થવાનો આદેશ આપ્યો હતો. જે બાદ ન તો તેઓ હાજર થયા ન તો તેમના વતી કોઈ વકીલ બેન્ચ સમક્ષ હાજર થયા. જે બાદ કોર્ટે કહ્યું હતું કે માલ્યા બ્રિટનમાં આઝાદ માણસની જેમ રહે છે, પરંતુ તે ત્યાં શું કરી રહ્યો છે તેની કોઈને માહિતી નથી.

વિજય માલ્યા પર તેમની કિંગફિશર એરલાઇન સાથે સંબંધિત 9,000 કરોડ રૂપિયાના બેંક લોન કૌભાંડમાં સામેલ હોવાનો આરોપ છે. જે બાદ તે દેશ છોડીને ભાગી ગયો હતો અને હાલ બ્રિટનમાં રહે છે.