વડોદરામાં રખડતા ઢોર બાદ હવે કૂતરાઓનો ત્રાસ અસહ્ય બની રહ્યો છે. રખડતી ગાયો બાદ હવે રખડતા શ્વાન પણ લોકોને રંજાડી રહ્યાં હોય જાણે લોકો ઘરમાં પૂરાઈ રહેવા મજબૂર બન્યા છે. આવામાં શહેરના સમતા વિસ્તારમાંથી એક ખૂબ ચોંકાવનાકો, અરેરાટીભર્યો બનાવ પ્રકાશમાં આવ્યો છે. અહીં એક રખડતાં શ્વાને પાંચ મહિનાની બાળકી પર હુમલો કર્યો હતો. ઘરમાં ઘોડિયામાં ઊંઘતી 5 મહિનાની બાળકીને ઉંચકીને શ્વાન લઈ ગયો હતો. આ બાળકી કૂતરાના મોંઢામાંથી રોડ ઉપર પટકાતાં તેનુ માથું ફાટી ગયું હતું. માથામાંથી નીકળતું લોહી કૂતરુ ચાટવા લાગ્યું હતું. આવા ભયાવહ દ્રશ્યો વચ્ચે માતાએ ભારે જહેમતે દીકરીને બચાવી હતી.
વડોદરામાં અતિ ચકચારી બનેલી આ ઘટના સમતા વિસ્તારના વૈકુંઠ ફ્લેટની છે. ફ્લેટના એક ઘરમાં અચાનક શ્વાન ઘૂસી આવ્યો હતો. માતા ઘરમાંથી પાણી ભરવા માટે બહાર નળ પાસે ગઈ અને દરવાજો ખુલ્લો હોવાથી શ્વાન ઘરમાં ઘૂસી ગયું હતું. કુતરાએ ઘોડિયામાં સુતી પાંચ મહિનાની જાનવી નામની બાળકી પર હુમલો કર્યો હતો. કૂતરાએ પહેલા બાળકીનું માથું ફાડી નાખ્યું હતું અને બાદમાં તેનુ લોહી ચાટવા લાગ્યું હતું. આ જોઈ તરત માતા દોડી આવી હતી. માતાએ કૂતરાને ભગાડવાનો પ્રયાસ કર્યો છતાં કૂતરું ત્યાંથી ન હટ્યુ. આખરે માતાએ બાળકીને હાથમાં ઊંચકી લીધી અને બાળકીને બચાવી ઘરમાંથી ભાગી ગઈ હતી. તો ઈજાગ્રસ્ત બાળકીને વડોદરાની ગોત્રી મેડિકલ હોસ્પિટલમાં ગંભીર હાલતમાં દાખલ કરવામાં આવી હતી. જ્યાં આ માસૂમ સારવાર હેઠળ હોવાનું જાણવા મળે છે.
રવિવારે શહેરમાં રખડતા ઢોરના આતંકની બનેલી આ બીજી ઘટના હોવાનું કહેવાય છે. વડોદરામાં રવિવારે સવારે રખડતા ઢોરના કારણે માતા પુત્રીને પણ ઈજા પહોંચી હતી. જ્યારે હવે રાત્રે રખડતા કૂતરાએ બાળકી પર હુમલો કર્યો હતો. અગાઉ પણ સુંદરપુરા ગામ પાસે શ્વાને બાળકીનો અંગૂઠો કરડી ખાધો હતો. રખડતાં ઢોર અને કૂતરાઓના કારણે થતાં અકસ્માત અને હુમલાના આવા બનાવોને પગલે વિસ્તારમાં નાગરિકોએ ઘરમાંથી નીકળવાનું ઓછું કરી દીધાનું પ્રતિત થઇ રહ્યું છે. છતાં વડોદરામાં મ્યુનિસિપલ કોર્પોરેશનું તંત્ર જાણે ઘોર નિંદ્રામાં હોય તેવી સ્થિતિ દેખાઈ રહી છે.
ગુજરાતી
English
हिन्दी
मराठी